100. EL ADIJAT

El Adijat (mekase) 11 ajete

Me emrin e Allahut,

të Gjithëmëshirshmit, Mëshiruesit!

1. Për vrapuesit e shpejtë, që hingëllijnë,
2. që me thundrat e tyre nxjerrin xixëllima nga gurët!
3. Ata të cilët vërsulen herët në agim,
4. duke ngritur pluhurin përpjetë,
5. dhe ashtu hidhen mu në mes të turmës.
6. Vërtet, njeriu ndaj Zotit të vet është përbuzës,
7. dhe për këtë ai është dëshmues.
8. Dashurinë për pasuri ai e ka shumë të madhe,
9. por a nuk e di ai se kur të dalin jashtë ato çfarë varret mbajnë,
10. dhe kur të dalin në shesh ato çfarë fshihen në kraharorë,
11. atë ditë, vërtet, Zoti i tyre i di me hollësi veprat e tyre!