Rruga e Muslimanit Faqe Islame
El Mulk (mekase) 30 ajete
- I Madhëruar është Ai, në dorën e të Cilit është i tërë sundimi, Ai i Cili është i Plotpushtetshëm për gjithçka.
- Është Ai që krijoi vdekjen dhe jetën, për t’ju provuar se cili prej jush është më vepërmirë. Ai është Ngadhënjyesi, Mëkatfalësi.
- Ai krijoi shtatë qiej, palë mbi palë. Në krijimin e Mëshiruesit nuk mund të shohësh ndonjë mospërputhje. Vëzhgo, atëherë: a sheh ndonjë të çarë?!
- Përsëri e përsëri vëzhgo, por ky vëzhgim do të të kthehet mbrapsht i përulur dhe i dorëzuar!
- Qiellin e dynjasë, Ne e kemi zbukuruar me kandilë (yje), që i kemi bërë gjuajtës kundër shejtanëve, ndaj të cilëve kemi përgatitur dënimin me zjarr të ndezur fort.
- Dënimi në Xhehenem është edhe për ata që nuk i besojnë Zotit të tyre. Sa vend i keq është ai!
- Kur të hidhen në të, ata do t’ia dëgjojnë ushtimën e vlimit të tij.
- Nga zemërimi që ka, ai gati sa nuk shpërthen! Sa herë që ndonjë turmë do të hidhet në të, roja do t’i pyesë: “A s’ju erdhi ndonjë paralajmërues?”
- Ata thonë: “Po, na erdhën paralajmërues (nga Zoti), por ne i mohuam duke iu thënë: “Allahu nuk ka shpallur asgjë, ndërsa ju nuk jeni gjë tjetër, por veçse njerëz në një humbje të madhe!”
- Ata do thonë gjithashtu: “Sikur të kishim dëgjuar dhe pasur mend, ne nuk do të ishim tani ndër banorët e Zjarrit!”.
- Pra, kështu i pranojnë ata gjynahet e veta. Larg mëshirës qofshin banorët e Zjarrit!
- Pa dyshim se, për ata që i frikësohen Zotit të vet pa e parë Atë, do të ketë falje dhe shpërblim të madh!
- I fshihni ose i thoni fjalët tuaja haptas, nuk ka dyshim se Ai e di çka fshihni në zemrat tuaja.
- A nuk e di Ai që ka krijuar, kur dihet se Ai është i Gjithëdituri në imtësi rreth sekreteve.
- Është Ai që e bëri tokën të përshtatshme për ju. Ecni nëpër të dhe shfrytëzoni begatitë e Tij. Vetëm tek Ai është e ardhmja.
- A u garantuat ju prej Atij që është në qiell, që të mos ju përpijë toka kur të dridhet?!
- Apo u garantuat prej Atij që është në qiell, që të mos lëshojë kundër jush ndonjë stuhi me rrebesh gurësh?! Ju do ta kuptoni se si është ndëshkimi Im!
- Edhe ata që ishin para tyre mohuan, por si ishte dënimi Im?
- A nuk i vështrojnë shpendët përmbi ta, kur qëndrojnë pezull krahëhapur dhe kur krahët i mbledhin? Ata nuk i mban kush në ajër veç të Gjithmëshirshmit.. Ai është Shikues i gjithçkaje.
- Ç’është ajo ushtri e juaja që mund t’ju ndihmojë, veç Rrahmanit? Nuk ka dyshim se jobesimtarët janë të zhytur në një mashtrim të madh.
- Kush është ai që do t’ju furnizojë, nëse Ai jua ndërpret furnizimin e Vet? Jo, askush, por ata vazhdojnë me arrogancë e kundërshtime.
- Ai që ecën i përmbysur me fytyrë për tokë është më i udhëzuar, apo ai që ecën me ekuilibër të plotë në rrugën e drejtë?!
- Thuaj: “Është Ai që ju krijoi, që ju dhuroi të dëgjuarit, shikimin dhe aftësinë e të menduarit, por shumë pak mirënjohje po tregoni ndaj Tij.”
- Thuaj: “Është Ai që ju krijoi e ju shumoi në tokë dhe vetëm tek Ai do të tuboheni!”
- Ata thonë: “Kur do të realizohet ky premtim, nëse jeni të saktë?”
- Thuaj: “Atë e di vetëm Allahu, ndërsa unë jam veçse një qortues, që ju qartësoj të vërtetën!”
- Kur ta shohin atë (Xhehenemin) që t’u afrohet, fytyrat e jobesimtarëve do shëmtohen. Ndërsa atyre u thuhet: “Ky është ai që ju kërkonit ta shihnit realisht!”
- Thuaj: “Më tregoni ju, nëse Allahu ma merr shpirtin mua dhe atyre që janë me mua, ose na mëshiron, kush do t’i mbrojë jobesimtarët prej një dënimi të mundimshëm?!”
- Thuaj: “Ai është i Mëshirshmi! Atij i kemi besuar dhe vetëm tek Ai jemi mbështetur! Kurse ju do ta kuptoni se kush është i humburi i vërtetë!”
- Thuaj: “Më tregoni, nëse uji juaj humbet në thellësi, kush do t’ju sjellë juve ujë në sipërfaqe?”